Gönguleiðin yfir Fimmvörðuháls frá Skógum yfir í Þórsmörk er ein af vinsælustu leiðum landsins. Leiðin liggur frá Skógafossi og upp með Skógánni þar sem við fáum að njóta þeirra fjölmörgu fossa sem hana prýða. Áfram er haldið upp í skarðið á milli jöklanna Eyjafjallajökuls og Mýrdalsjökuls þar sem við skoðum gígana Magna og Móða sem urðu til í gosinu 2010. Þar getum við athugað hvort við finnum ennþá einhvern varma frá hrauninu.

Því næst höldum við niður í áttina að Þórsmörk og njótum útsýnis yfir hálendið og jöklana í kring. Þegar niður er komið tekur gróðurinn á móti okkur og við þræðum okkur í gengum birkiskóginn þar til komið er í Bása þar sem bíllinn sem fer með okkur aftur að Skógum bíður okkar.

Með því að bæta Hálendispassa Kynnisferða við bókunina þarftu ekki að hafa áhyggjur af því að koma þér til og frá upphafsstað. Þú getur svo valið um að taka rútuna til baka frá Básum til Reykjavíkur samdægurs eða gista eina nótt í Þórsmörk og taka rútuna heim daginn eftir.

Ath. lágmarksfjöldi í ferðina er 4 farþegar.

Lágmarks aldur: 12 ára